VI. Кичик бизнес ва хусусий тадбиркорлик фаолиятини янада ривожлантиришни таъминлайдиган ишбилармонлик муҳитини яратиш бўйича

6.1.  Кичик тадбиркорликни ривожлантириш.

Мамлакатда қулай ишбилармонлик муҳитини яратиш ва тадбиркорликни жадал ривожлантириш борасида қатор ижобий ўзгаришлар амалга оширилмоқда. Ўз ўрнида, тадбиркорлик субъектларини давлат рўйхатидан ўтказиш ва ҳисобга қўйиш борасида ҳам қонунчиликда муҳим қарорлар қабул қилиниб, давлат рўйхатидан ўтказиш ва ҳисобга қўйишни автоматлаштирилган тизими босқичма-босқич ишлаб чиқилиб, амалиётга тадбиқ қилинмоқда. Бу эса аҳоли ҳамда хорижий инвесторларнинг ўз шахсий бизнесини йўлга қўйиш ва ривожлантириш учун муҳим омил бўлиб хизмат қилмоқда.

2020 йилнинг январь-июнида кичик тадбиркорликнинг ЯИМдаги улуши 51,3 фоизни ташкил этди. Кичик тадбиркорлик субъектларининг сони ҳар 1000 аҳолига 14,4 бирликни ташкил қилди.

Мазкур даврда янги ташкил этилган кичик корхона ва микрофирмалар энг кўп савдода 16588 та, саноатда 9713 та, қишлоқ, ўрмон ва балиқ хўжалигида 8525 та, қурилишда 3302 та, яшаш ва овқатланишда 2460 та, ташиш ва сақлашда 1148 та ташкил этилган.

6.2. Лицензия ва рухсат беришни соддалаштириш.

Алоҳида фаолият турлари билан шуғулланишда лицензия ва рухсат бериш тартиб-таомилларини қисқартириш мақсадида, лицензиялаш ва рухсатнома бериш тартиб-таомилларини оптималлаштириш бўйича идоралараро ишчи гуруҳи тузилиб, мавжуд бўлган жами 62 та (266 та фаолият бўйича) лицензия ва 137 та рухсатномалар тўлиқ хатловдан ўтказилди ва ахборот-таҳлилий маълумот киритилди.

Бундан ташқари, Ўзбекистон Республикаси Президентининг “Лицензиялаш ва рухсат бериш тартиб-таомилларини тубдан такомиллаштириш чора-тадбирлари тўғрисида”ги Фармони лойиҳаси ишлаб чиқилди (Давлат дастурининг 87-банди). Лойиҳага асосан 1 000 га яқин белгиланган бюрократик жараёнлар қисқартирилмоқда. Хусусан:

Биринчидан, хабардор қилиш тартиби алоҳида институт сифатида жорий этилмоқда: 44 та лицензияланадиган фаолият йўналишлари ва 13 турдаги рухсатномалар хабардор қилиш механизмига ўтказилмоқда.

Иккинчидан, қарийб 100 та лицензияланадиган фаолият йўналишлари ва 35 та рухсатномаларни бекор қилиш орқали ёки муқобил шаклларга ўтказиш назарда тутилмоқда. Натижада, тадбиркорлик субъектларининг йилига қарийб 125 млрд. сўм маблағлари иқтисод қилиниб, ўз ихтиёрида қолдирилади.

Учинчидан, лицензиялаш, рухсат бериш ва хабардор қилиш жараёнлари “Лицензия” ахборот тизими орқали тўлиқ электронлаштирилади. Натижада, маъмурий тартиб-таомилларни амалга оширишдаги коррупцион ҳолатларнинг юзага келиши чекланади, тадбиркорларнинг боғлиқ вақт ва молиявий харажатлари иқтисод қилинади.

Тўртинчидан, 115 та лицензия ва рухсат бериш тартиб-таомилларини янада қисқартириш ва соддалаштириш ҳамда 14 турдаги фаолиятлар бўйича ҳужжатларни расмийлаштириш муддатлари қисқартириш орқали бизнес жараёнлар ва маъмурий тартибларнинг кенг кўламли енгиллаштирилиши кўзда тутилган.

Бешинчидан, лицензия ва рухсатномаларни бекор қилиш фақат суд тартибида амалга ошириш таклиф этилмоқда. Шу билан бирга, аризалар ўз вақтида кўриб чиқилмаса, автоматик равишда лицензия ёки рухсатнома расмийлаштириб берилади.
 

6.3. Ер участкаларига оид маълумотларни очиқ ва шаффофлигини таъминлаш.

Тадбиркорлар учун ер участкаларига оид маълумотларни очиқ ва ҳаққоний етказиш тизимини такомиллаштириш юзасидан “E-ijro auksion”, “Yer-elektron” электрон тизимлари базасида республикада ягона бўлган “E-kadastr.uz” ахборот дастури очиқ электрон портали яратилиб, қайта такомиллаштирилди (Давлат дастурининг 85-банди).

Бугунги кунда “E-kadastr.uz” ахборот дастури очиқ электрон порталига жисмоний ва юридик шахслар аниқ инвестиция мажбуриятлари билан бирга, ер участкаси ва режалаштирилаётган қурилиш объекти тўғрисидаги маълумотларни жойлаштириш юзасидан таклифлар киритиш учун жами 10995 та ер участкасида 911,67 гектар бўш ер майдони жойлаштирилди.

Шу билан бирга, ахборот дастурида ер участкасининг кадастр рақами, жойлашган жойи, тоифаси, майдони, унга туташ ер участкаларининг белгиланган мақсади, турлари, умумий фойдаланишдаги автомобиль йўлларигача бўлган масофа тўғрисидаги маълумот ва тизимдаги ҳаракатлар тарихини кузатиб туриши мумкинлиги бўйича имкониятлар яратилди.

Ҳудудларда аёллар ва ёшлар тадбиркорлигини ривожлантириш бўйича амалий дастур ишлаб чиқилиб, тасдиқланди (Давлат дастурининг 86-банди).

Унда тегишли лойиҳалар учун микромолия хизматлари ва молиявий ресурслар ажратиш, давлат харидлари тизимида иштирок этиш имкониятларини кенгайтириш ва бошқалар кўзда тутилди.