"TARAQQIYOT STRATEGIYASI"
MARKAZI
TARAQQIYOT STRATEGIYASI MARKAZIYangiliklar2019“Faol investitsiyalar va ijtimoiy rivojlanish yili”...
"Taraqqiyot Strategiyasi" markazi

“Faol investitsiyalar va ijtimoiy rivojlanish yili” Davlat dasturi loyihasining ekspertlik muhokamasi bo’lib o’tdi

2019-yil 11-yanvar kuni O’zbekiston Respublikasi Prezidenti huzuridagi Davlat boshqaruvi akademiyasida “Faol investitsiyalar va ijtimoiy rivojlanish yili” deb nomlangan 2019-yilgi Davlat dasturi loyihasi muhokamasiga bag’ishlangan davra suhbati bo’lib o’tdi. Tadbir O’zbekiston Respublikasi Oliy Majlisi Senati tomonidan “Taraqqiyot strategiyasi” markazi bilan birgalikda tashkil etildi.

Tadbirda O’zbekiston Respublikasi Oliy Majlisi Senati a’zolari, Qonunchilik palatasi deputatlari, “Buyuk kelajak” xalqaro nohukumat tashkiloti ekspertlari, “Taraqqiyot strategiyasi” markazi, “O’zbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi vakillari, nodavlat notijorat tashkilotlari, keng jamoatchilik vakillari, OAV xodimlari ishtirok etdilar.

So’zga chiqqanlar tomonidan qayd etilganidek, 253 ta bandni o’z ichiga olgan Davlat dasturi loyihasida O’zbekiston Respublikasi Prezidenti Sh.M. Mirziyoyevning 28 dekabrdagi Oliy Majlisga murojaatnomasida keltirilgan asosiy g’oyalar va takliflar, shuningdek 2017-2021-yillarda O’zbekiston Respublikasini rivojlantirishning beshta ustuvor yo’nalishi bo’yicha Harakatlar strategiyasida belgilangan vazifalar o’z aksini topdi. Xususan, hujjatda davlat va jamiyat qurilishi tizimini takomillashtirish, qonun ustuvorligini ta’minlash, sud-huquq tizimini isloh qilish, iqtisodiyotni rivojlantirish va liberallashtirish, ijtimoiy sohani rivojlantirish, xavfsizlik, millatlararo totuvlik va diniy bag’rikenglikni ta’minlash hamda chuqur o’ylangan, o’zaro manfaatli va amaliy tashqi siyosat olib borish kabi yo’nalishlarda joriy yilda qo’yiladigan qadamlar aks etgan. Davra suhbati davomida 2019-yilga mo’ljallangan Davlat dasturi loyihasining barcha jihatlari muhokama etildi.

Jumladan, Yil dasturiga ko’ra, Hukumat a’zolarini Oliy Majlis tomonidan, hududiy davlat organlari rahbarlarini esa tegishli xalq deputatlari Kengashlari tomonidan tasdiqlash amaliyotini joriy etish taklif etilmoqda. Davra suhbati ishtirokchilari tomonidan qayd etilishicha, bunday amaliyot vazirlar va joylardagi mansabdor shaxslarning parlament va jamoatchilik oldidagi javobgarligini oshirishga erishish imkonini beradi. Buning ustiga, yangi mexanizmning joriy etilishi yuqori lavozimlarga nomzodlarni tayyorlaydigan partiyalar demokratik jarayonlarda faolroq ishtirok etadi. Shu munosabat bilan tadbir ishtirokchilari tomonidan joriy etilayotgan mexanizm samarali ishlashi haqida fikr-mulohazalar bildirildi.

Muhokama etilayotgan hujjatda iqtisodiyotni rivojlantirish va faol investitsiyalarni jalb qilish sohasiga alohida e’tibor qaratilgani davra suhbatida ta’kidlandi. Xususan, mamlakatimiz iqtisodiyotini tubdan modernizatsiyalashga, byudjetlararo munosabatlar izchilligini, iste’mol tovarlar narxlari barqarorligini ta’minlashga, to’g’ridan-to’g’ri xorijiy va mahalliy investitsiyalar jalb qilishning yangi mexanizmlarini joriy etishga, olib borilayotgan islohotlar samaradorligini ta’minlashga qaratilgan keng ko’lamli chora-tadbirlar nazarda tutilgan. 2020-yil 1-yanvardan Milliy hisoblarning zamonaviy tizimini to’liq joriy etish, 2019-yil 1-sentyabrgacha esa soliqlar bo’yicha imtiyoz va preferensiyalarni bekor qilishni nazarda tutgan Soliq kodeksi yangi tahririni, Raqamli iqtisodiyot milliy konsepsiyasini ishlab chiqish, sug’urta bozorini isloh qilish va jadal rivojlantirish, “Sug’urta faoliyati to’g’risida”gi Qonunning yangi tahririni ishlab chiqish shular jumlasidandir.

Shuningdek, Dasturda “yashirin iqtisodiyot” ga qarshi kurashish va uning YaIMdagi ulushini keskin kamaytirish orqali mamlakatimizning xalqaro suveren kredit reytingini oshirish va Global raqobatbardoshlik reytingiga kirish bo’yicha ishlar nazarda tutilganligi alohida ta’kidlab o’tildi. Bundan tashqari, bank-moliya tizimini yanada rivojlantirish, iqtisodiyotda davlat ulushini kamaytirish hisobiga tadbirkorlik muhitini sog’lomlashtirish, jahon bozoriga integratsiyalashuv yo’li bilan mamlakatimiz eksport salohiyatini kuchaytirish va hududlarning mustaqilligini mustahkamlash, qishloq xo’jaligini tubdan isloh qilish orqali yer va suv resurslaridan oqilona foydalanish, ilg’or texnologiyalar joriy qilib, oziq-ovqat xavfsizligini ta’minlash ishlari amalga oshirilishi davra suhbati ishtirokchilari tomonidan qo’llab-quvvatlandi.

O’zbekiston Respublikasida 2019-2025-yillarda turizm sohasini rivojlantirish konsepsiyasining muhimligi ta’kidlab o’tildi. Hujjat mamlakatimizda turizm infratuzilmasini yanada takomillashtirishga, turizm mahsulotlari va xizmatlarini diversifikatsiya qilishga, mashhur xalqaro mehmonxona tarmoqlarini jalb etishga, shuningdek mehmonxonalar qurilishining uzoq muddatga mo’ljallangan dasturini amalga oshirishga, turizm tarmog’i uchun yuqori malakali mutaxassislar tayyorlash tizimini rivojlantirishga qaratilgan.

Tadbirda ta’kidlanganidek, Dasturda davlat organlari faoliyati ochiqligini ta’minlashga, ular ishining samaradorligini oshirishga, qonun hujjatlarini takomillashtirishga, mazkur yo’nalishdagi nuqsonlarni bartaraf etishga ham alohida e’tibor qaratilmoqda. Uy-joyga muhtoj insonlarga ko’maklashish, kam ta’minlangan kishilarga moddiy yordam ko’rsatish, jumladan imtiyozli uy-joy ajratish, aholi salomatligini asrash chora-tadbirlari rejalashtirilgan.

Tadbir ishtirokchilari tomonidan xavfsizlik, millatlararo totuvlik va diniy bag’rikenglikni ta’minlash sohasidagi ustuvor yo’nalishlarni har tomonlama muhokama qildilar. Mamlakatimizning mudofaa qobiliyatini mustahkamlash, Qurolli Kuchlarning jangovar qudratini oshirish, axborot xavfsizligini ta’minlash va Internet tarmog’ida milliy kontentni rivojlantirish bo’yicha aniq chora-tadbirlar qo’llab-quvvatlanishi bildirildi.

Shuningdek, qayd etilganidek, Markaziy Osiyoda suv resurslaridan oqilona foydalanish, Orolbo’yi mintaqasida yangi muhofaza etiladigan, jumladan transchegaraviy tabiiy hududlarni tashkil etish 2019-yilgi Davlat dasturining muhim yo’nalishi hisoblanadi.

O’zbekiston Respublikasi Tashqi siyosiy faoliyati konsepsiyasini tasdiqlash to’g’risidagi Qonunning ishlab chiqilishi va qabul qilinishi xalqaro maydonda mamlakatimiz siyosiy-iqtisodiy manfaatlarini ilgari surishga, davlatimizning tashqi iqtisodiy va siyosiy faoliyatini takomillashtirishga shubhasiz xizmat qilishi ta’kidlandi.

Davra suhbati ishtirokchilari muhokama etilgan Davlat dasturi loyihasining barcha bandlari bo’yicha o’z fikrlarini bildirdilar. Shuningdek, ekspertlar tomonidan 2019.strategy.uz va regulation.gov.uz veb-saytlari orqali fuqarolardan tushgan amaliy takliflar ko’rib chiqildi.

Tadbir yakunlari bo’yicha loyihani takomillashtirish va qabul qilish bo’yicha tavsiyalar ishlab chiqildi.