AQSH biznes doiralari uchun O‘zbekiston ishonchli va ochiq hamkor sifatida namoyon bo‘lmoqda
Kerolin Lemm,
Amerika-O‘zbekiston Savdo palatasi raisi
– O‘tgan yillar davomida biz O‘zbekistonda tub iqtisodiy va huquqiy o‘zgarishlarni kuzatdik. Mamlakat iqtisodiyoti bosqichma-bosqich markazlashgan boshqaruvdan bozor munosabatlariga o‘ta boshladi. Bu jarayonda investorlar uchun qulay muhit yaratish, ularning huquqlarini qonun doirasida kafolatlashga qaratilgan muhim qadamlar tashlandi.
Bugungi kunda xorijiy kompaniyalar, jumladan, AQSH biznes doiralari uchun O‘zbekiston ishonchli va ochiq hamkor sifatida namoyon bo‘lmoqda. Iqtisodiyotni erkinlashtirishga qaratilgan strategiyalar mamlakatning barqaror va uzoqni ko‘zlagan iqtisodiy siyosatini anglatadi.
O‘zbekistonda investorlar uchun ochiq, barqaror va qonuniy jihatdan himoyalangan muhit yaratilgani e’tiborga molik. Biz hammamiz O‘zbekiston va uning kompaniyalari ushbu strategiyani ro‘yobga chiqarishida faol ishtirok etishimiz kerak.
Shu o‘rinda, Prezident Shavkat Mirziyoyevga huquqiy tizimni shakllantirish, investitsiyalarni amalga oshirish uchun zarur sharoitlarni yaratishdagi barcha yutuqlari uchun minnatdorlik bildiraman. Uning rahbarligida Konstitutsiyaga o‘zgartishlar kiritildi, ko‘plab qonunlar qabul qilinib, tizim amalda tubdan o‘zgardi. Bu o‘zgarishlar sarmoya kiritish uslubini ham, investor sifatida kafolatlangan huquqlaringizni ham yangicha darajaga olib chiqdi.
Bularning barchasi savdo va investitsiya faoliyatini rivojlantirishga xizmat qilib, O‘zbekiston ehtiyojlarini qondirishga qaratilgan kuchli siyosiy va huquqiy intizomni belgilab berdi. Chindan ham, xorijiy investitsiya to‘g‘risidagi qonunlar rivojini kuzatar ekanmiz, investorlar huquqlarining mustahkam himoyalanganini yaqqol ko‘rish mumkin.
Amerika-O‘zbekiston Savdo palatasi 1993 yilda 13 ta AQSH kompaniyasining tashabbusi bilan tashkil etilgan. O‘shanda palata o‘z faoliyatini ikki davlat o‘rtasidagi savdo-iqtisodiy aloqalarga ko‘maklashish maqsadida boshlagan edi. Bugungi kunga kelib, palataning a’zolari soni 50 tadan oshib ketdi va u AQSH kompaniyalari uchun O‘zbekistondagi eng muhim muloqot platformasiga aylandi.
Ikki davlat o‘rtasidagi iqtisodiy munosabatlar nafaqat sarmoya va savdo, balki bilim almashuvi, texnologiyalar transferi va inson kapitali rivoji bo‘yicha ham istiqbolli yo‘nalishlarga ega.
Bizning umumiy maqsadimiz iqtisodiy o‘sish hamda barqaror, shaffof va huquqiy jihatdan himoyalangan biznes muhitini ta’minlashga hissa qo‘shishdir. Amerika-O‘zbekiston Savdo palatasi ana shu maqsadlarga sodiq qolgan holda faoliyat olib bormoqda.
Manba: O‘z