• О'zbek

Uzbekistan2030.uz

"TARAQQIYOT STRATEGIYASI"
  MARKAZI
"Taraqqiyot Strategiyasi" markazi

DAVLAT DASTURI IJROSI: MADANIYAT SOHASI TUBDAN ISLOH ETILMOQDA


Maʼlumki, “Ilm, maʼrifat va raqamli iqtisodiyotni rivojlantirish yili” Davlat dasturining 218-bandida Madaniyat sohasini tubdan takomillashtirish choralarini ko‘rish masalasi belgilangan edi.

Ushbu band ijrosini taʼminlash maqsadida esa, tegishli normativ-huquqiy hujjat loyihasini ishlab chiqish, unda Madaniyat vazirligi tashkiliy tuzilmasi va hududiy tuzilmalari vazifa va funksiyalarini qayta ko‘rib chiqish, madaniy-maʼrifiy sohada amalga oshirilayotgan ishlarni yangi bosqichga olib chiqish, bunday tadbirlarga sanʼatkorlarni shartnoma asosida jalb qilish kabi chora-tadbirlar aks ettirilishi nazarda tutilgan.

O‘zbekiston Respublikasi Prezidenti tomonidan joriy yil 26-mayda imzolangan “Madaniyat va sanʼat sohasining jamiyat hayotidagi o‘rni va taʼsirini yana-da oshirish chora-tadbirlari to‘g‘risida”gi Farmon va “O‘zbekiston Respublikasi Madaniyat vazirligi faoliyatini takomillashtirish chora-tadbirlari to‘g‘risida”i Qaror Davlat dasturining 218-bandi ijrosini taʼminlashga qaratilgani bilan ham alohida ahamiyatga ega.

Farmonga ko‘ra:

2020–2021-yillarda O‘zbekiston Respublikasida madaniyat va sanʼatni yana-da rivojlantirishga doir qo‘shimcha chora-tadbirlar dasturi;

O‘zbekiston Respublikasida milliy madaniyatni yana-da rivojlantirish konsepsiyasining 2021–2025-yillarga mo‘ljallangan maqsadli ko‘rsatkichlari tasdiqlandi.

Shuningdek, 2021-yil 1-yanvardan boshlab:

konsert-tomosha faoliyatini litsenziyalash, litsenziatlarning davlat reyestrini yuritish, ularning faoliyati va erishgan natijalari haqidagi axborotlarni kiritib borish Konsert-tomosha faoliyati ishtirokchilarining yagona onlayn portali orqali amalga oshirilishi;

konsert-tomosha tadbiriga bir martalik ruxsatnoma berish uchun undiriladigan yig‘im bekor qilinishi;

davlat organlari va tashkilotlarining asosiy vazifa va funksiyalaridan kelib chiqib, ularning tashabbuslari bilan o‘tkaziladigan ommaviy-madaniy va konsert-tomosha tadbirlari har yili tasdiqlanadigan ommaviy-madaniy va konsert-tomosha tadbirlarining kalendar rejalari asosida o‘tkazilishi;

O‘zbekiston Respublikasi Prezidenti, Vazirlar Mahkamasi hamda mahalliy davlat hokimiyati organlarining kalendar rejalarda nazarda tutilmagan davlat tadbirlarini o‘tkazishni nazarda tutuvchi qarorlarida ushbu tadbirlarni tashkil etish bo‘yicha ko‘rsatiladigan xizmatlar bo‘yicha buyurtmachilar hamda ularni moliyalashtirish manbalari ko‘rsatilishi;

konsert-tomosha faoliyatini amalga oshiruvchi shaxslar tomonidan davlat organlari va boshqa tashkilotlarning buyurtmalariga asosan ko‘rsatiladigan barcha xizmatlar yozma va haq evaziga tuziladigan shartnoma asosida taqdim etilishi (konsert-tomosha faoliyatini amalga oshiruvchi davlat muassasalari xodimlari bilan tuzilgan mehnat shartnomalaridan kelib chiqadigan majburiyatlar bundan mustasno) belgilab qo‘yildi.

Bundan tashqari, 2020-yil 1-sentabrdan boshlab:

davlat organlari va tashkilotlari tizimidagi konsert, madaniyat saroylari va boshqa muassasalarda to‘liq jonli ijro asosida o‘tkazilgan konsert dasturlari uchun ijara to‘lovidan 50 foiz chegirma berish tartibi joriy etiladi;

Madaniyat vazirligi tomonidan xarid qilingan, ommaviy ijroga mo‘ljallangan dramatik, musiqali va musiqali-dramatik asarlarni xususiy teatrlarda ham sahnalashtirish va ijro etishga ruxsat beriladi.

Farmon bilan:

Madaniyat va sanʼat sohasi vakillarining Sanʼatkor, ijodkor va ijrochilarning mualliflik huquqlarini himoya qilish palatasini tashkil etish to‘g‘risidagi tashabbuslari maʼqullandi.

Madaniyat vazirligi markaziy apparati tuzilmasida madaniyat muassasalari va havaskorlik sanʼatini rivojlantirish, sohada axborot texnologiyalarini keng joriy etish va raqamlashtirish masalalariga masʼul vazir o‘rinbosari lavozimi joriy qilinadi.

Respublika qo‘g‘irchoq teatriga O‘zbek Milliy qo‘g‘irchoq teatri nomi berildi.

Quyidagi muassasalar faoliyati yo‘lga qo‘yiladi:

Navoiy, Namangan, Sirdaryo va Toshkent viloyatlarida qo‘g‘irchoq teatrlari;

Yunus Rajabiy nomidagi O‘zbek milliy musiqa sanʼati instituti;

Madaniy meros ilmiy-tadqiqot instituti;

Karim Zaripov nomidagi Respublika estrada va sirk kolleji;

V.Uspenskiy va R.Glier nomidagi Respublika ixtisoslashtirilgan musiqa maktablari;

Madaniyat vazirligi tizimida Respublika musiqa va sanʼat kolleji.

Shu bilan birga, 2020-yil sentabr oyidan boshlab davlat muzeylarida har oyning birinchi yakshanbasi “ochiq eshiklar kuni” deb eʼlon qilinadi hamda shu kunlari fuqarolar davlat muzeylariga bepul kiritiladi.

Bundan buyon har yili 15-aprel sanasi “O‘zbekiston Respublikasi madaniyat va sanʼat xodimlari kuni” sifatida nishonlanadi.

Vazirlar Mahkamasi huzuridagi O‘zbekistonga oid xorijdagi madaniy boyliklarni tadqiq etish markazi to‘liqligicha Madaniyat vazirligi tizimiga o‘tkaziladi.

Davlat rahbarining “O‘zbekiston Respublikasi Madaniyat vazirligi faoliyatini takomillashtirish chora-tadbirlari to‘g‘risida”gi Qarori bilan esa, Madaniyat vazirligi faoliyatining samaradorligini oshirish maqsadida:

“Axborot va kompyuter texnologiyalari markazi” davlat muassasasi “Yosh ijodkorlarni qo‘llab-quvvatlash va axborot-multimedia markazi” davlat muassasasi etib qayta nomlanmoqda hamda Madaniyat va sanʼat ko‘rgazmasi bilan Yoshlar madaniyat va sanʼat markazi tugatilib, ularning byudjetdan moliyalashtiriladigan shtat birliklari, balansida bo‘lgan binolar hamda boshqa moddiy-texnika vositalari Madaniyat vazirligiga o‘tkazilmoqda;

Madaniyat vazirligi huzuridagi Madaniy meros departamenti va uning barcha hududiy boshqarmalari tuzilmasida tegishlicha yuridik shaxs maqomiga ega bo‘lmagan Badiiy ekspertiza boshqarmasi hamda badiiy ekspertiza bo‘limlari tashkil etilmoqda;

Madaniyat vazirligi huzuridagi “Madaniy meros tiklash-taʼmirlash” davlat unitar korxonasi hamda Departament huzuridagi “Meros chashmasi” davlat unitar korxonasi tugatilib, ularga tegishli binolar hamda boshqa moddiy-texnika vositalari belgilangan tartibda Madaniy meros ilmiy-tadqiqot institutiga o‘tkazilmoqda;

Markazlashtirilgan investitsiyalar hisobiga moliyalashtiriladigan obyektlarni qurish, rekonstruksiya qilish, kapital va joriy taʼmirlash bo‘yicha buyurtmachi xizmatining nomi Madaniyat vazirligi huzuridagi “Yagona buyurtmachi xizmati” injiniring kompaniyasi etib qayta nomlanmoqda;

“Guliston”, “Teatr” va “Moziydan sado” jurnallari tahririyatlari yagona tahririyatga birlashtirilmoqda.

Shuningdek, Qarorga ko‘ra:

Madaniy meros ilmiy-tadqiqot institutiga qonun hujjatlari talablariga rioya qilgan holda, arxitektura-shaharsozlik hujjatlarini yaratish, geodeziya va kartografiya faoliyati, moddiy madaniy merosning ko‘chmas mulk obyektlarini asrashga doir faoliyat turlarini tegishli litsenziyalarni olmasdan amalga oshirish huquqi berilmoqda.

Vazirlar Mahkamasi huzuridagi O‘zbekistonga oid xorijdagi madaniy boyliklarni tadqiq etish markazi mavjud shtat birliklari va moddiy-texnika bazasi bilan to‘liq hajmda, moliyalashtirish, mehnatga haq to‘lash va moddiy rag‘batlantirishning amaldagi tartibini saqlab qolgan holda Madaniyat vazirligi tizimiga o‘tkazilmoqda.

Ushbu Qaror bilan:

O‘zbekiston Respublikasi Madaniyat vazirligining tashkiliy tuzilmasi;

O‘zbekiston Respublikasi Madaniyat vazirligi markaziy apparatining tuzilmasi;

hududiy madaniyat organlari xodimlarining cheklangan soni tasdiqlandi.

Qarorda Vazirlar Mahkamasi zimmasiga:

Madaniyat vazirligi huzuridagi Madaniy meros ilmiy-tadqiqot instituti faoliyatini tashkil etish chora-tadbirlari to‘g‘risidagi;

Departament faoliyatini takomillashtirish va barqaror ravishda moliyalashtirish, xodimlari mehnatini moddiy rag‘batlantirishni kuchaytirish, shu jumladan, ularga xizmat qilgan umumiy ish staji, ilmiy unvon va darajaga ega bo‘lgani uchun ustamalar belgilash, moddiy-texnika bazasini tubdan yaxshilash chora-tadbirlari to‘g‘risidagi;

Madaniy boyliklarni realizatsiya qilish faoliyatini amalga oshirish uchun ruxsat berish tartib-taomillaridan o‘tishning xabardor qilish tartibi to‘g‘risidagi qaror loyihalarini kiritish vazifalari yuklatildi.

“Taraqqiyot strategiyasi” markazi
Axborot xizmati