
Marchin Vakar,
Polsha Respublikasining
Oʻzbekistondagi elchixonasi muvaqqat ishlar vakili
– Xabaringiz bor, 2025-yil Polsha Yevropa Ittifoqi Kengashiga raislik qilmoqda. Bu davrda biz Markaziy Osiyo bilan hamkorlik koʻlamini kengaytirish, ayniqsa mintaqadagi yetakchi davlatlardan biri hisoblangan Oʻzbekiston bilan aloqalarni kengaytirishni rejalashtirganmiz.
Hozirgi kunda Polsha va Oʻzbekiston munosabatlari savdo almashinuvi, madaniy aloqalar va siyosiy muloqot jadal rivojlanishi bilan tavsiflanadi. Polsha Oʻzbekistonga Markaziy Osiyodagi asosiy hamkor sifatida qaraydi. Muntazam tus olgan maslahatlashuv formati davlatlarimiz oʻrtasidagi samarali hamkorlikni taʼminlamoqda. Xalqlarimizni bogʻlab turuvchi teran aloqalar ramziga aylangan mashhur xonanda Anna German merosining oʻziyoq madaniy aloqalarimiz koʻlami haqida tasavvur berishi mumkin.
Umuman olganda, aloqalarimiz boy tarixga ega. Birinchi va Ikkinchi jahon urushlari hamda oʻtgan asr 30-yillarida Polshaning ayrim hududlari sobiq sovet tuzumi taʼsirida boʻlgani tufayli, koʻpchilik polyaklar yashash uchun Oʻzbekistonga koʻchib oʻtgan. Ularning avlodlari hanuz shu mehmondoʻst zaminda umrguzaronlik qilmoqda.
Hamkorligimizning yana bir ustuvor yoʻnalishi – taʼlim. “Study in Poland” dasturi Oʻzbekiston taʼlim bozoridagi ishtirokini mustahkamlamoqda. Bizning yurtimizda tahsil olayotgan oʻzbek talabalari soni yil sayin ortib, ayni payt 2100 dan oshgan.
Bugungi kunda Toshkent davlat agrar universiteti talabalari Polshadagi oliy taʼlim muassasasi bilan qoʻsh diplom dasturi asosida oʻqimoqda. Poytaxtdagi TEAMS universitetida oʻzbekistonlik yoshlarning biznes sohasidagi bilimini chuqurlashtirish imkonini beruvchi ikki tomonlama MBA diplomi dasturi yoʻlga qoʻyildi. Ushbu loyiha Markaziy va Sharqiy Yevropadagi eng yaxshi oliy oʻquv yurtlaridan biri hisoblangan Varshavadagi Leon Kozminskiy akademiyasi bilan hamkorlikda amalga oshirilmoqda.
Polsha – Oʻzbekiston tarix komissiyasi ikki davlat olimlarining umumiy tarixni oʻrganish, tarixiy manbalarni izlash, oʻzaro material almashish, qoʻshma tadqiqot oʻtkazishga qaratilgan faoliyatini qoʻllab-quvvatlab kelmoqda.
Shu oʻrinda migratsiya mavzusiga alohida toʻxtalib oʻtmoqchi edim. Aytish joiz, ayni yoʻnalishda biz oʻtish davrini boshdan kechiryapmiz. Aniqrogʻi, hozir Polshada migratsiya boʻyicha yangi siyosat joriy etilmoqda. Eng muhimi, tadbirkorlarimiz oʻzbekistonlik migrantlar haqida juda yaxshi fikr bildirmoqda. Masʼullarimiz hujjatlarni koʻrib chiqish bosqichini tezlashtirib, jarayonni tartibga keltirishyapti. Tez orada aloqalarimiz keskin ijobiy tomonga oʻzgarishi kutilmoqda.
Soʻnggi yillarda savdo aloqalarimiz yangi bosqichga koʻtarildi. Maʼlumki, Oʻzbekistonning toʻqimachilik mahsulotlari mamlakat eksportida yetakchi tarmoqlardan biri sanaladi. Polsha esa bu borada Yevropadagi eng yirik importchi sifatida eʼtirof etiladi.
Oʻzbekistonga Polshadan kirib kelayotgan parranda goʻshti va qoʻshimchalar, shokolad va tarkibida kakao boʻlgan boshqa oziq-ovqat mahsulotlari, shuningdek sabzavot – asosan kartoshka va yem miqdori ortmoqda. Umuman, tadbirkorlarimizning mamlakatingizga qiziqishi kuchaymoqda. Elchixonaga ishbilarmonlar tomonidan hamkorlik oʻrnatish imkoniyati haqida juda koʻp murojaat tushyapti. Qolaversa, oʻtgan yil mart oyida Varshava va Toshkent oʻrtasida toʻgʻridan-toʻgʻri havo qatnovi yoʻlga qoʻyilgani ham hamkorlikni chuqurlashtirish sari tashlangan dadil qadam boʻldi.
Polshaning LOT aviakompaniyasi COVID-19 pandemiyasidan keyin mintaqa bilan aloqa oʻrnatgan Yevropa qitʼasidagi ilk operator hisoblanadi. Dastlab haftasiga 3-marta amalga oshirilgan reyslar keyinchalik 4 taga yetkazildi. Bu ham aloqalarni yanada rivojlantirishga xizmat qiladi.
Bir soʻz bilan aytganda, mamlakatlarimiz orasidagi nisbatan yiroq masofaga qaramay, qalban bir-biriga yaqin xalqlarimiz oʻrtasidagi hamjihatlik rishtasi mustahkam. Ikki davlat rahbarlari olib borayotgan oqilona siyosat esa doʻstligimizni yanada mustahkamlashga zamin yaratmoqda.
Manba: OʻzA